Коми Республикаса Юралысь лоö Коми Республикаса медвылыс чина мортöн (Коми Республикаса Правительствоöн юрнуöдысьöн).
Коми Республикаса Оланподув, 80 статья.
Россия Федерацияса гражданинлы Коми Республикаса Юралысьлысь полномочиеяс сетö Коми Республикаса Государственнöй Сöвет Россия Федерацияса Президентöн вöзйöм серти федеральнöй оланпасöн артыштöм пöрадок серти да кадö.
Коми Республикаса Юралысьлысь полномочиеяс федеральнöй оланпас серти вермасны сетны Россия Федерацияса гражданинлы, кодлöн абу йöз му государстволöн гражданство либö олöм вылö эскöданпас либö мукöд документ, мый эскöдö Россия Федерацияса гражданинлысь йöз му государство мутасын пыр олöмсö, да кодлы тырöма 30 арöс.
Коми Республикаса Юралысьлысь полномочиеяс збыльмöдан кад - нёль во.
Коми Республикаса Оланподув, 81 статья.
Коми Республикаса Юралысь босьтчö уджö кыпыд ёрсьöг сетöмсянь:
"Коми Республикаса Юралысь чинö босьтчигöн кыпыда кöсйыся бура олöмö пöртны меным индöм Коми Республикаса Юралысьлысь ыджыд могъяс, пыдди пуктыны да дорйыны мортлысь да гражданинлысь право да вöля, стöча збыльмöдны Россия Федерацияса Оланподув, федеральнöй оланпасъяс, Коми Республикаса Оланподув да Коми Республикаса оланпасъяс".
Ёрсьöг сетсьö Коми Республикаса государственнöй кывъяс вылын Коми Республикаса Государственнöй Сöвет водзын Коми Республикаса Оланподув Ёрдлöн ёрдысьяс дырйи.
Коми Республикаса Оланподув, 82 статья.
Коми Республикаса Юралысь:
1) олöмö пöртö аслас полномочиеяс серти мортлысь да гражданинлысь правояс да вöля збыльмöдöм, могмöдöм да дорйöм кузя, ас эмбур да общественнöй пöрадок видзöм, преступносьткöд тыш нуöдöм кузя мераяс;
2) петкöдлö Коми Республикаöс государственнöй власьт федеральнöй органъяскöд, Россия Федерацияса субъектъяслöн государственнöй власьт органъяскöд, меставывса асвеськöдлан органъяскöд йитöдъясын да ортсыса экономическöй йитöдъяс олöмö пöртігöн, та дырйи сылöн эм право кырымавны Коми Республика нимсянь сёрнитчöмъяс да артмöдчöмъяс;
3) котыртö Коми Республикаса Правительство Коми Республикалöн законодательство серти да примитö Коми Республикаса Правительствоöс уджысь вештöм йылысь решение;
4) сылöн эм Коми Республикаса Государственнöй Сöветын оланпас вöзъян право;
5) йöзöдö оланпасъяс, та дырйи йöзöдöмсö эскöдö оланпасъяс кырымалöмöн, либö вештö Коми Республикаса Государственнöй Сöветöн примитöм оланпасъяс;
6) вермö корны чукöртны Коми Республикаса Государственнöй Сöветлысь неöчереднöй заседание, а сідзжö корны выльысь бöрйöм Коми Республикаса Государственнöй Сöветöс медводдза заседание вылö сійö кадысь водзджык, мый урчитöма та вылö Коми Республикаса Государственнöй Сöветлы Коми Республикаса Оланподулöн;
7) вермö участвуйтны Коми Республикаса Государственнöй Сöветлöн уджын сöвещайтчан гöлöс правоöн;
8) вермö примитны Коми Республикаса Государственнöй Сöветлысь полномочиеяс кадысь водз дугöдöм йылысь решение федеральнöй оланпас да Коми Республикаса Оланподув серти;
81) пыртö Коми Республикаса Государственнöй Сöветö муниципальнöй юкöнса бöрйöм орган лэдзалöм йылысь Коми Республикаса оланпас бала федеральнöй оланпас серти;
82) йöзöдö муниципальнöй юкöнлöн юралысьöс либö муниципальнöй юкöнлöн администрацияса юрнуöдысьöс (юралысьöс) чинысь вештöм йылысь правовöй акт федеральнöй оланпас серти;
83) примитö меставывса асвеськöдлан органъяслысь öткымын полномочие Коми Республикаса олöмö пöртысь власьт органъясöн недыр кад збыльмöдöм йылысь решение федеральнöй оланпас серти;
84) ходатайствуйтö муниципальнöй юкöнын недыр кадся финансöвöй администрация пыртöм йылысь федеральнöй оланпасöн урчитöм дырйи да пöрадок серти;
9) сетö Коми Республикаса Государственнöй Сöветлы Коми Республикаса республиканскöй бюджет бала да Коми Республикаса республиканскöй бюджет олöмö пöртöм йылысь отчёт;
10) сетö Коми Республикаса Государственнöй Сöветлы Коми Республикаса социально-экономическöй сöвман уджтасъяслысь балаяс да тайö уджтасъяс олöмö пöртöм йылысь отчётъяс;
101) быд во выступайтö Коми Республикаса Государственнöй Сöветлöн заседание вылын республикаын олöм йылысь да локтан кад вылö Коми Республикаса олöмö пöртысь власьтлöн уджтас йылысь юöрöн;
11) Государственнöй Сöветлöн сöгласие серти индö чинö Коми Республикаса Юралысьöс вежысьясöс, Коми Республикалöн сьöм овмöсса министрöс;
12) мездö чинысь Коми Республикаса Юралысьöс вежысьясöс, Коми Республикалöн сьöм овмöсса министрöс, индö чинö да мездö чинысь Коми Республикаса мукöд министрöс, Коми Республикалöн олöмö пöртысь власьт мукöд органса юрнуöдысьясöс;
13) лöсьöдö Коми Республикаса олöмö пöртысь власьт органъяслысь тэчас;
14) индö чинö Коми Республикаса Государственнöй Сöветлöн сöгласие серти Россия Федерацияын да сылöн субъектъясын, войтыркостса организацияясын да йöз му государство мутасъясын Коми Республикаöс петкöдлысьясöс; мездö чинысь Россия Федерацияын да сылöн субъектъясын, войтыркостса организацияясын да йöз му государство мутасъясын Коми Республикаöс петкöдлысьясöс;
15) индö Коми Республикаса Правительствосянь Россия Федерацияса Федеральнöй Собраниелöн Федерация Сöветын петкöдлысьöс;
16) индö Коми Республикаса бöрйысян комиссияö вына гöлöс правоа джын пырысьсö;
17) шыöдчö Россия Федерацияса Оланподув Ёрдö да Коми Республикаса Оланподув Ёрдö Россия Федерацияса законодательство серти да Коми Республикаса законодательство серти;
18) наградитö Коми Республикаса государственнöй наградаясöн да сетö Коми Республикаса почёт нимъяс, вöзйö Россия Федерацияса государственнöй наградаясöн наградитöм вылö;
181) координируйтö Коми Республикаса олöмö пöртысь власьт органъяслысь Коми Республикаса государственнöй власьт мукöд органкöд удж да Россия Федерацияса законодательство серти вермö котыртны Коми Республикаса олöмö пöртысь власьт органъяслысь олöмö пöртысь федеральнöй власьт органъяскöд да сылöн мутас органъяскöд, меставывса асвеськöдлан органъяскöд да общественнöй котыръяскöд öтув удж;
182) сетö Россия Федерацияса Президентлы Коми Республикаса олöмö пöртысь власьт органъяслысь удж донъялöм могысь збыль шедöдöмторъяс да планируйтан удж йылысь докладъяс;
19) олöмö пöртö мукöд полномочие, мый индöма пöртны олöмö федеральнöй оланпасъясöн, Коми Республикаса Оланподулöн да Коми Республикаса оланпасъясöн.
Коми Республикаса Оланподув, 84 статья.
Коми Республикаса Юралысь аслас полномочиеяс серти Россия Федерацияса Оланподув, федеральнöй оланпасъяс, Россия Федерацияса мукöд нормативнöй правовöй акт, Коми Республикаса Оланподув, Коми Республикаса оланпасъяс да Коми Республикаса мукöд нормативнöй правовöй акт вылö подуласьöмöн да найöс збыльмöдöм могысь йöзöдö Коми Республика мутас пасьтала вына индöдъяс да тшöктöмъяс.
Коми Республикаса Оланподув, 85 статья.
