Обычная версия сайта
Размер шрифта: -A +A

Президент Российской Федерации

Правительство Российской Федерации

Совет Федерации Федерального Собрания РФ

Государственная Дума Федерального Собрания РФ

Сервер органов государственной власти Российской Федерации

Национальный антитеррористический комитет

Антитеррористическая комиссия Республики Коми



НОВОСТИ

2019 воын “Велӧдӧм” национальнӧй проект збыльмӧдӧм вылӧ республикалы федеральнӧй сьӧмкудйысь сетасны 330 миллионысь унджык шайт

16.01.2019

Та йылысь регионса велӧдан, наука да том йӧз политика министрлысь могъяс олӧмӧ портысь Наталья Якимова юӧртіс Коми Республикаса Юралысь Сергей Гапликовлы, кор найӧ сёрнитісны 2018 воын юкӧн сӧвмӧдӧмын медшӧр кывкӧртӧдъяс да таво вылӧ пуктӧм могъяс йылысь.

2018 вося йирым тӧлысьӧ Россия Федерацияса велӧдан министерство да Том йӧзлӧн удж серти федеральнӧй агентство юӧртісны “Велӧдӧм” национальнӧй проект збыльмӧдӧм серти федеральнӧй сьӧмкудйысь субсидияяс босьтӧм вылӧ субъектъясӧс бӧръян ӧткымын конкурс йылысь.

Коми Республикаса велӧдан, наука да том йӧз политика министерство ыстіс конкурсъясӧ пырӧдчӧм вылӧ 9 заявка, а сідзжӧ “Демография” национальнӧй проект серти федеральнӧй сьӧмкудйысь сьӧм босьтӧм вылӧ заявка.

Кывкӧртӧдъяс вӧчӧм бӧрын вӧлі примитӧма помшуӧм, мый серти Коми Республикалы федеральнӧй сьӧмкудйысь сетасны 473,1 млн шайт мында субсидия, медым збыльмӧдны “Велӧдӧм” национальнӧй проектлӧн нёль федеральнӧй проектлысь, а сідзжӧ “Демография” национальнӧй проектлӧн ӧти федеральнӧй проектлысь мероприятиеяссӧ.

Индӧм сьӧмсӧ веськӧдасны материально-техническӧй база выльмӧдӧм вылӧ, медым сӧвмӧдны велӧдчысьяслысь ӧнія технологическӧй да гуманитарнӧй тӧдӧмлунъяссӧ, дзоньвидзалунын дзескӧдӧм позянлуна челядьӧс велӧдӧм, Енбиа челядьӧс аддзан да налы отсалан шӧрин сӧвмӧдӧм, челядьӧс сӧвмӧдан медшӧр шӧринъяслысь уджсӧ нуӧдӧм вылӧ (“Кванториум” мобильнӧй технопарк, “Питирим Сорокин нима СКУ” бердын содтӧд тӧдӧмлун сетан инновация шӧрин), а сідзжӧ цифрӧвӧй велӧдан гӧгӧртаслысь торъя мога модель пыртӧм, Коми Республикаын “IT-куб” цифрӧвӧй велӧдан шӧрин восьтӧм, “Бур вӧчӧмторъяслӧн регион” волонтёрство нуӧдӧмын отсӧг сетан медбур региональнӧй практикаяс серти ставроссияса конкурс нуӧдӧм да 3 арӧсӧдз челядьлы детсадъясын содтӧд местаяс лӧсьӧдӧм вылӧ.

“Велӧдӧм” национальнӧй проектӧ пырӧ нин дас федеральнӧй проект. Йирым тӧлысьӧ ми вӧчим ыджыд удж – дасьтім ассьыным региональнӧй проектъяс. Ыстӧм ӧкмыс заявкаысь Велӧдан министерство бӧрйис кӧкъямыссӧ. Сьӧмсӧ сетасны ёна унджык сы серти, мыйта ми корим. Федеральнӧй сьӧмкудйысь ми босьтам 500 миллион гӧгӧр шайт”, - юӧртіс Наталья Якимова.

Коми Республикаса Юралысь тшӧктіс торйӧн бура видзӧдны велӧдан услугаяслысь качествосӧ кыпӧдӧм бӧрся. 2019 воын заводитчас “Аскиа велӧдысь” региональнӧй проект. Сійӧс веськӧдӧма велӧдысьяслӧн тӧдӧмлун серти туялӧмсӧ котыртӧм, педагогика уджалысьяслысь уджсикасын кужанлунсӧ, квалификация тшупӧдсӧ кыпӧдӧм, том специалистъяслы медводдза куим уджалан воӧ быд сикас ногӧн отсалӧм вылӧ.

“Педагог пуктӧ ыджыд пай кагалӧн сӧвмӧмӧ. Миян эмӧсь бур примеръяс сиктса школаясын, кӧні челядь шедӧдӧны ыджыд вермӧмъяссӧ буретш велӧдысьлӧн енбиалун да уджалан сям вӧсна. Колян вежонӧ ме ветлі Помӧсдінӧ. Сэтчӧс школаса инфраструктуралы 150 во нин. Та дырйи сійӧ нималӧ выпускникъясӧн, сё балл вылӧ экзаменъяс гижысьясӧн, - пасйис Сергей Гапликов. - Челядьӧс колӧ велӧдны бура. Тайӧ зэв тӧдчана стратегическӧй мог, кутшӧмӧс колӧ пӧртны олӧмӧ быд боксянь. Колӧ ёнмӧдны материально-техническӧй база да сӧвмӧдны юкӧнлысь кадрӧвӧй позянлунъяссӧ”.

 

Фотографияяс

 

email home map
IT -опрос населения по оценке деятельности органов местного самоуправления

эко-Республика

Инвестиционный портал Республики Коми

Российский инвестиционный форум

Витрина закупок Республики Коми

Портал государственных услуг РФ
Цифровое эфирное телевидение
Активный регион Республика Коми

Официальный интернет-портал правовой информации

© 2019 ГАУ РК «ЦИТ»