Обычная версия сайта
Размер шрифта: -A +A

Антитеррористическая комиссия Республики Коми

Президент Российской Федерации

Правительство Российской Федерации

Совет Федерации Федерального Собрания РФ

Государственная Дума Федерального Собрания РФ

Сервер органов государственной власти Российской Федерации

Официальный интернет-портал правовой информации



КОМИ МУÖЙ МЕНАМ

Коми (шуöны асьнысö), коми морт ("коми человек"), коми войтыр ("коми народ"), зыряна (важ роч ним). Коми Республикаса вужвойтыр (автономияыс 1921 восянь) олöны сідзжö Архангельскöй, Мурманскöй, Тюменскöй обласьтъясын. Лоöны рöдвужöн коми-пермякъяслы да удмуртъяслы. Сёрнитöны коми (-зыряна) кыв вылын.

 

КОМИ МУЫН ЭКСПЕДИЦИЯЯС ДА ТУЯЛÖМЪЯС

 

XII-сянь XIV-öд нэмöдз шöр Эжвалöн да улыс Емвалöн муяс, кутшöмъяс тöдсаöсь кыдзи Эжва Перым муяс, кутöны Новгородскöй княжествокöд вузасьöм кузя йитöдъяс да лоöны сылöн влияние улын. Нималана роч историк С.М. Соловьёв тадзи гижліс сійö кадся Коми му йылысь: "... оз сетчы роч князьяслы, олöны сэні зыряна да йöгра, абу ышöдана да абу безопаснöй сям сертиыс абу воинственнöй овмöдчысьяслы, кодъяс локтöны вöлі неыджыд чукöръясöн". Великöй Новгородлöн надзöникöн слабмöм, да Московскöй княжестволöн кыпöдчöм ради артмö мутассö роч государстволöн öтувъя интересъясö кыскöмыс.

1379 воын роч муяс öтувтысь москваса князь Дмитрий Ивановичлöн (Дмитрий Донскойлöн) ошкöмöн да вичкоса иерархъяслöн бурсиöмöн Коми муö православие йöз костын паськöдны мöдöдчö Стефан (Перымса), коді пуктіс подув бöрыннас выль Перым епархиялы шöриннас Емдінын.

1481 воын государствосянь гижалöны Москваса княжествоö пыртöм Эжва да Емва бердса муяс, да на вылö паськалö "государлöн вуз-вот".

"Российскöй государстволöн историяын" Н.М. Карамзин казьтылö, кыдзи Иоанн III царствуйтöм дырйи, 1479 воын "корсьны Печора матігöгöрын эзысь кöрт шом" мöдöдісны экспедиция, кытчö пырисны "кык немеч, Иван да Виктор". А нуöдісны найöс Андрей Петров да Василий Болтин. Сизим тöлысь ветлöм-мунöм бöрын лои кывкöртöд пыдди опишитöма эзысь кöрт шомлысь "да ыргöнлысь, Чилим ю вылын, Косма юсянь кызь, Печорасянь куимсё верст сайын... дас верст пасьтала" куйланінсö. Сійö кадсяньыс роч государствоын, кыдзи гижö Карамзин, "пондісны асьныс перйыны, сывдны кöрт да чоканитны сьöмпас асланыс эзысьысь, лоины и зарни сьöм либö российскöй медальяс".

1768 - 1772 воясын Коми му юкöн туяліс Россияса наукаяс Академиялöн И.И. Лепёхин юрнуöдöм улын экспедиция. Академик Иван Иванович Лепёхин (1740 - 1802 вояс) вöлі нималана роч путешественникöн да натуралистöн. Сыöн юрнуöдöм улын экспедицияыс туяліс Россиялысь паськыд мутас: Оренбургскöй край, Поволжье, Перымса Урал берд да Урал сай. Лепёхин вöлі Коми мулöн уна ю вылын: Эжва да Сыктыв, Летка да Луза, воліс на вылын меститчöм оланінъясö.

 

КОМИЛÖН ТРАДИЦИОННÖЙ КУЛЬТУРА

 

Этническöй мутас

Эжва перымсаяслöн - коми (зыряна) пöль-пöчьяслöн этническöй мутасыс артмыны пондіс шöр нэмъяслöн бöръя помын (X-XV нэмъяс). Сэки босьтчисны видзны скöт да вöдитны му, заводитіс сöвмыны кипод удж. Эжва Перым овмöдчö öти местаö. Тайö кадколастö коми (перымсаяс) овмöдчисны бура паськыд мутасын улыс да шöр Эжвалöн Сыктыв да Емва, Юг да Луза, улыс Сухона да Ичöт Войвыв Двина, вылыс Пинега да Ву ю ковтысъясын.

Печора вожын да Эжва йылын тайö кадö меститчисны пыгыд кöялысьяс - öстякъяс, йöгра да самоедъяс - öнія йöгралöн да яранъяслöн пöль-пöчьяс. Асыввыв да асыв-войвыв районъясö комилысь нырччöмсö пасйöма XV-öд нэмсянь, такöд тшöтш найö колисны рытыввылын овмöдöм мутас юкöнъяс. XV нэмын чужисны медводдза овмöдчöминъяс Эжва йылын да Висер вылын. Мозын йылын да улыс Печора вылын комиыс овмöдчис XVI нэмын, Печора йылын да шöр Печора вылын - XVII нэмын. XVII нэм чöжöн бырины комилöн овмöдчöминъяс улыс Эжва, Луза да Пинега вылын.

Комилöн этническöй мудорыс асыввылын сöвмис XVIII нэмын, войвылын - XIX нэмын. Тайö кад кежлö помöдз артмис этническöй мутас. Асыввылын сылöн суйöрöн лоины Урал гöраяс, лунвылын мутаслöн мудорыс муніс Эжва ваюксянінті да Сыктыв да Кама ваюксянінті, рытыввылын - Ву да Пинега, Сыктыв да Вилядь мусюрöд. Войвылын вöлі стöч мудор этнографическöй роч группакöд (чилимдінсаяслöн) Неридз юлöн Печора вож вом кузя да эз стöч мудор, кутшöм муніс улыс Печора да Большеземельскöй тундра матігöгöрті, кöр видзысь яранъяслöн да коми-изьватаслöн унаысь аддзысьланінъясті.

XII нэмсянь Коми му век пырис новгородскöй владениеясö. XII-XIII нэмъяс чöж асыв-войвыв муяс ас киö босьтöм вöсна Новгородлöн медшöр водзсасьысьöн пыр вöлі Владимиро-Суздальскöй (Ростово-Суздальскöй) княжество.

 

ПАРМА САЙÖД УЛЫН СÖСТÖМ КЛЮЧÖН...

 

Быд национальнöй культураын, кодлöн эм уна нэмся история, петкöдчöны оланногсö бурмöдöмын, оланін стрöитöмын да йöзлöн кипод уджын да устно-поэтическöй творчество традицияясын вöвлытöм, сöмын тайö этнослы лöсяланаторъяс.

Коми войтырлöн декоративно-прикладнöй искусствоыс ворсö уна мича рöмöн да уна ногöн. Коми йöз тöдісны кöртуловысь вöчасьöм, дона кöртулов-изйысь вöчасьöм, ку песöм да кöрт серöн сійöс мичмöдöм, куысь, сюмöдысь, вужйысь, идзасысь уна сикас кыöм, пу серöдöм, пу вывті кöртöн да идзасöн серöдöм. Коми войтырлöн творческöй выныс петкöдчис устнöй поэтическöй да сьылан уна сикас жанрын, шыладын, серпасасьöмын.

 

НАЦИОНАЛЬНÖЙ ПАСЬКÖМ

 

Коми национальнöй культуралöн аслыспöлöслуныс петкöдчис и йöзлöн паськöмын. Сэтчöдз, кор XIX нэмлöн мöд джынйын кутісны вайны вузалöм вылö дöра да дась паськöм, ёна вöлі сöвмöма печкöм да дöра кыöм. Комилöн эмöсь асланыс терминъяс пасйыны производстволысь техникасö да орудиеяссö, а сідзжö печкöмын да дöра кыöмын öткымын аслыспöлöс приём.

Бöрынджык шöр крестьянинлöн быд лунъя паськöмыс артмö вöлі улыс дöрöм-гачысь, вылыс дöрöмысь да гачысь, мый вöлі вурöма прöстöй да донтöм дöраысь. Праздникса паськöмсö артмöдісны шöвк либö сатин дöрöм, ной гач да ньöбöм ной кафтан да кучикысь вурöм сапöг. Нывбабалöн паськöмыс вöлі уна сикасджык: торъялö вöлі паськöмыс нывлöн, верöс сайö мунöм аньлöн, дöвалöн да пöчлöн. Тайö торъялöмсö позьö вöлі казявны юр кышöд форма, вылыс платтьö сер да весиг дöра серти.

 

ОЛАНİН. КИПОД УДЖ

 

Пуысь вöчасьöм

Коми пармаыс, вöрса озырлуныс сетісны позянлун сöвмöдны керка стрöитан сям, пунас вöдитчисны кыдзи медшöр стрöитчан материалöн. Грезд, сикт вöліны пуысьöсь. Тайö ясыда петкöдчö и крестьяналöн гортса уна сикас кöлуй серти. Пуысь вöчасисны шемöсмöдана сюся да кужöмöн. Вöчасисны став сикас пöрöда пуысь, став пу юкöнысь. Кужöмöн вöчалісны уна сикас пу дозмукъяс.

 

Дöра кыöм. Кысьöм

Станокöн дöра серöдöмыс комияслöн вöлі некымын сикас. Станокöн кыан прöдукцияöн лоины ки чышкöдъяс, пызандöраяс да аньяслы дöрöмъяс. Художественнöй аслыспöлöслун серти коми йöзлöн тайö традиционнöй да ёна сöвмöм искусствоыслöн ыджыд тöдчанлуныс Асыввыв Европаын серöн кысьöмлöн сöвмöмын.

Традиционнöй искусстволöн уна сикас пиын тöдчана места босьтö 5 емöн сер кыöм. Комилöн кыан серыс сöвмис йöзлöн торъя группаясöн тайö либö мукöд серсö кыны надзöникöн велалöмöн да ас ног вöчöмöн. Та вöсна быд районын сöвмис сылöн аслыссикаслун.

 

Музыкальнöй инструментъяс

Коми йöзлöн традиционнöй музыкальнöй инструментъяс пиын эм став сикас йöзкостса музыкальнöй инструментыс. На пиысь сэтшöмъяс, кыдзи чипсан, пöлян да мукöд - аслыспöлöсöсь, торъялöны аслыссикас ворсанногöн. Таысь кындзи, Россияын да мирын олысь войтырлöн музыкальнöй инструментальнöй культура сöвмöдöмö Коми муысь мастеръяс пуктісны тöдчана пай (музыкальнöй мастер Налимов да мукöд).

 

Ку, кучик вöчöм

Кучик вöчöмыс, сапöг вурöмыс ёна сöвмис войдöр нэмын. Кучик да ку вöчанногыс, торйöн нин, няр вöчöм, лоины кад кольöм бöрын чöжöс вайысь уджöн, а сэсся и экономика боксянь тöдчанлуна производствоöн.

 

ОБРЯДЪЯС ДА ТРАДИЦИЯЯС

 

Коми йöзлöн творческöй позянлуныс петкöдчис устнöй поэтическöй да сьыланкывлöн, йöзкостса музыкалöн да серпасасьöмлöн уна сикас жанрын. Уна нэм чöжöн коми войтыр лöсьöдіс бöрдöдчанкывъяс, шусьöгъяс да кывйöзъяс, мойдкывъяс, эпическöй сьыланкывъяс да балладаяс, частушкаяс, удж йылысь да лирическöй сьыланкывъяс, челядьлы фольклор, йöзкостса драма да йöзкостса музыка. Став тайö устнöй поэтическöй творчестволöн уна сикас жанрын петкöдчис коми йöзлöн олöмыс, зільлуныс, тужа-нужаыс да лачаыс, сылöн вежöрыс да локтан кадö эскöмыс. Аслыспöлöслуннас комияслöн торъялісны кöлысь поэзия да кöлысь обрядъяс.

XIX нэмлöн мöд джынйын Коми муын чужисны частушкаяс да элегическöй сьыланкывъяс, сьыланкывъяс-казьтылöмъяс, пример пыдди позьö вайöдны Шондібанöй-олöмöй" сьыланкыв. Налöн артмöмыс лои коми сьыланкыв фольклорлы зэв тöдчанаторйöн, öд сэтчö пырис коми войтырлöн уна нэмчöжся поэтическöй сямыс.

 

 (РНА УрЮ КНШ Кыв, литература да история институтлöн материалъясысь)

 

email home map

Форум Арктика Система-112
Инвестиционный портал Республики Коми
Региональный раздел Республики Коми на федеральном Информационном портале об Оценке регулирующего воздействия

Открытая Республика

Оценка регулируещего воздействия Республики Коми

Памятные даты военной истории России

Геопортал

Приемная Президента Российской Федерации в Республике Коми

Реализация указов Президента Российской Федерации

Портал государственных услуг РФ

 Портал государственных услуг Республики Коми

Федеральный портал управленческих кадров

Резерв управленческих кадров Республики Коми

Избирательная комиссия Республики Коми

Общественная палата Республики Коми

Законодательство Республики Коми

Пожары в Республике Коми

ГБУ РК «Коми республиканский центр энергосбережения»

Цифровое эфирное телевидение

Портал открытых данных Республики Коми

Бюджет для граждан

Оценка населением муниципальной власти и организаций

Активный регион Республика Коми

Торгово-промышленная палата Республики Коми

Разработка сайта — веб-студия «Цифровой Век»